Mál nr. 2/2007

11.4.2008

Föstudaginn 11. apríl 2008 var á fundi kærunefndar húsnæðismála tekið fyrir mál nr. 2/2007:

A

gegn

Íbúðalánasjóði

 

og kveðinn upp svohljóðandi

 

Ú R S K U R Ð U R:

 

A, hér eftir nefndur kærandi, hefur með kæru dagsettri 3. desember 2007, sem barst kærunefndinni 4. desember sama ár, skotið til nefndarinnar ákvörðun Íbúðalánasjóðs, hér eftir nefndur kærði, dagsettri 13. nóvember 2007, þar sem kæranda er synjað um niðurfellingu innheimtukostnaðar, vegna innheimtu greiðslu af skuldabréfi með gjalddaga 1. ágúst 2007.

 

I. Málsmeðferð

Með bréfi, dagsettu 12. desember 2007, óskaði kærunefnd húsnæðismála eftir upplýsingum um meðferð málsins og frekari gögnum ef þau væru fyrir hendi hjá Íbúðalánasjóði, einnig að tekin yrði afstaða til kærunnar. Greinargerð kærða barst með bréfi dagsettu 28. desember 2007. Með bréfi dagsettu 22. janúar 2008 var greinargerð send kæranda til kynningar. Frekari athugasemdir bárust ekki.

 

II. Helstu málsatvik og kæruefni

Með bréfi, dagsettu 29. október 2007 óskaði kærandi eftir því við Íbúðalánasjóð að fá endurgreiddan kostnað samtals 16.000 kr. sem var til komin vegna dráttarvaxta, innheimtugjalds og birtingarkostnaðar vegna innheimtu greiðslu af láni með gjalddaga 1. ágúst 2007. Kærandi telur að mistök hafi verið gerð við innheimtu greiðslunnar þar sem hún fékk ekki tilkynningu um hana frá Íbúðalánasjóði hvorki með gíróseðli, í heimabanka né á annan hátt. Í kærunni fer kærandi fram á endurmat á kostnaði sem henni var gert að greiða þ.e. afborgunum, verðbótum og vöxtum sem námu samtals 12.000 kr. svo og dráttarvöxtum, innheimtugjaldi og birtingakostnaði samtals 16.000 kr. Samtals var henni gert að greiða rúmlega 29.000 kr.

 

III.Sjónarmið kæranda

Kærandi greinir frá því að hún hafi um mitt árið 2006 tekið að sér að greiða skuldabréf nr. Z sem gefið var út 10. janúar 1985, upphaflega að fjárhæð 207.000 kr. Greiðsluseðlar vegna afborgana af skuldabréfinu höfðu alltaf borist í pósti og jafnframt birst í heimabanka kæranda. Kærandi greinir frá því að henni hafi heldur ekki borist gíróseðill né önnur tilkynning um greiðslu af skuldabréfinu þann 1. nóvember 2007.

Kærandi telur sannað að henni hafi hvorki borist gíróseðill vegna greiðslunnar né hafi hún fengið upplýsingar um greiðsluna á annan hátt. Hún telur Íbúðalánasjóð hafa gert mistök og fer fram á endurmat á þeim kostnaði sem hún hefur þurft að greiða vegna þessa.

 

IV. Sjónarmið kærða

Kærði benti á að umrætt lán hafi verið skrá á kennitölu B, sem lést í byrjun árs 2005. Hvorki kærandi né aðrir hafi óskað eftir yfirtöku lánsins, aðeins hafði verið óskað eftir breytingu á nafni greiðanda. Samkvæmt upplýsingu frá Reiknistofu bankanna eru greiðsluseðlar lána ekki birtir í heimabanka einstaklinga, nema kennitala skráðs greiðanda og eiganda heimabankans beri saman. Hins vegar sé hægt að greiða alla greiðsluseðla í hvaða heimabanka sem er, svo fremi sem upplýsingar um lánsnúmer, kennitölu greiðanda og gjalddaga liggi fyrir, en þær komi fram á gíróseðlinum.

Eftir athugun á ferlum innan sjóðsins kom í ljós að gerð hafði verið heimilisfangabreyting á ofangreindu láni, þannig að skráð heimilisfang er nú X. Breytingin var ekki gerð fyrr en 25. október 2007, sama dag og greiðsluseðillinn var greiddur, þannig að á þeim tíma hefði greiðsluseðilinn átt að berast til kæranda með sama hætti og áður þ.e. á skráð lögheimili samkvæmt þjóðskrá.

Kærði greinir frá því að honum beri ekki skylda til að tilkynna greiðendum um gjalddaga bréfa. Greiðendur skuldabréfa takist á hendur að standa skil á greiðslum af lánum á þeim gjalddögum sem tilgreindir eru í viðkomandi skuldabréfi, skv. þeim skilmálum, sem skráðir eru í bréfið. Útsendingar sjóðsins á greiðsluseðlum og birting í heimabanka sé þjónusta sem Íbúðalánasjóður sinni til að auðvelda greiðendum afborganir af lánum.

Kærði kveður kostnað vegna innheimtunnar vera tvíþættan. Annars vegar sé um að ræða innheimtugjald samtals 4.500 kr. auk virðisaukaskatts skv. 1. tl. 1. mgr. 4. gr. reglugerðar um gjaldskrá Íbúðalánasjóðs, nr. 1016/2005. Hins vegar sé birtingarkostnaður samtals 1.530 kr. sem lagður sé á hvern gerðarþola. Samkvæmt 9. gr., sbr. 2. tl. 1. mgr. 2. gr. laga um nauðungarsölu ber að senda sérhverjum eiganda hinna veðsettu eignar greiðsluáskorun. Sex aðilar hafi fengið senda greiðsluáskorun þ.e. fimm núverandi eigendur umræddrar eignar og skráður skuldari, þar sem umrætt lán var enn á kennitölu hins látna. Lánið hafði ekki verið formlega yfirtekið við skipti á dánarbúi hans, heldur gerðist kærandi greiðandi þess. Hún hafði skráð nafn sitt og heimilisfang við kennitölu hins látna. Með vísan til alls framangreinds mótmælir kærði kröfum kæranda.

 

V. Niðurstaða

Málskot kæranda er reist á 1. mgr. 42. gr. laga um húsnæðismál nr. 44/1998. Hlutverk kærunefndar húsnæðismála er að skera úr ágreiningsmálum er kunna að rísa vegna ákvarðana Íbúðalánasjóðs og húsnæðisnefnda sbr. 1. mgr. 41. gr. laganna.

Kærandi fer fram á endurmat á greiðslu kostnaðar við innheimtu á greiðslu af skuldabréfi með gjalddaga 1. ágúst 2007, kostnaðurinn nam rúmlega 29.000 kr.

Hlutverk Íbúðalánasjóðs er meðal annars að annast lánveitingar og sinna viðskiptum með skuldabréf sem sjóðurinn gefur út í samræmi við ákvæði laga nr. 44/1998 um húsnæðismál, sbr. 1. tölul. 9. gr.

Samkvæmt gögnum málsins tók kærandi málsins að sér að greiða af umræddu skuldabréfi eftir andlát skráðs greiðanda. Þann 24. október 2007 barst henni og öðrum erfingjum skráðs greiðanda greiðsluáskorun frá kærða þar sem ekki hafði verið greitt af skuldabréfinu 1. ágúst 2007. Skuldabréf Íbúðalánasjóðs kveða skýrt á um greiðslur á ákveðnum gjalddögum og verður að gera kröfu um að þeir sem taki að sér að greiða af skuldabréfum kynni sér greiðsluskilmála þess. Engin ábyrgð hvílir á Íbúðalánasjóði um að tilkynna um greiðslur af skuldabréfum á gjalddaga.

Með hliðsjón af framangreindu er ekki grundvöllur til niðurfellingar kostnaðar vegna innheimtu greiðslu af skuldabréfi útgefnu af kærða.

 

Ú R S K U R Ð A R O R Ð :

Kæru A um synjun Íbúðalánasjóðs um niðurfellingu kostnaðar vegna innheimtu greiðslu af skuldabréfi er hafnað.

 

Þuríður Jónsdóttir, formaður

Ástráður Haraldsson

Vífill Oddsson