Mál nr. 19/2003

A gegn Íbúðalánasjóði

18.12.2003

Fimmtudaginn 18. desember 2003 var á fundi kærunefndar húsnæðismála tekið fyrir mál nr. 19/2003:

A

gegn

Íbúðalánasjóði

og kveðinn upp svohljóðandi

      

Ú R S K U R Ð U R:

A, X nr. 3, hér eftir nefndur kærandi, hefur með kæru, dags. 13. október 2003, sem barst kærunefnd 20. sama mánaðar, skotið til nefndarinnar ákvörðun Íbúðalánasjóðs, hér eftir nefndur kærði, dags. 30. september 2003, um að synja kæranda um niðurfellingu á láni.

I. Málsmeðferð

Kærunefnd húsnæðismála leitaði eftir eftirfarandi gögnum: Leitað var greinargerðar kærða sem barst nefndinni 4. nóvember 2003. Kæranda var sent afrit hennar og gefinn kostur á að gera athugasemdir við fyrrgreinda greinargerð. Frekari athugasemdir kæranda, dags. 11. nóvember 2003, bárust kærunefnd 13. sama mánaðar.

Kærunefnd húsnæðismála tók málið til úrskurðar þegar frekari athugasemdir kæranda lágu fyrir.

II. Helstu málsatvik og kæruefni

Kærandi er eigandi íbúðar að X nr. 3. Árið 1991 fékk kærandi greiðsluerfiðleikalán að fjárhæð 5,3 milljónir króna. Í janúar og maí 1994 var greiðsluerfiðleikalánið „fryst“ til þriggja ára og vanskilum að fjárhæð 830 þúsund krónur skuldbreytt til 15 ára. Í desember 1999 var frysting greiðsluerfiðleikaláns kæranda lengd um tvö ár. Í október 2001 voru öll lán kæranda lengd um 15 ár, þar á meðal skuldbreytingalánið frá 1994. Í mars 2003 var frysting greiðsluerfiðleikaláns kæranda lengd um eitt ár.

Með erindi, dags. 13. september 2003, fór kærandi fram á það við kærða að skuldbreytingalán hans, bankabréf nr. 300207, yrði fellt niður. Stjórn kærða tók málið fyrir á fundi sínum 17. september 2003 og var kæranda synjað með bréfi, dags. 30. sama mánaðar.

Kærandi kærði niðurstöðu kærða til kærunefndar húsnæðismála með kæru, dags. 13. október 2003, og óskaði endurskoðunar á henni.

Kærandi krefst þess að ákvörðun kærða verði felld úr gildi. 

  

III. Sjónarmið aðila.

Afstaða kæranda er byggð á kæru, dags. 13. október 2003, auk fylgigagna.

Kærandi segir að á árinu 1980 hafi hann ásamt konu sinni átt nær skuldlausa íbúð í Kópavogi. Upp úr því hafi hann hins vegar lent í veruleigum greiðsluerfiðleikum og heilsubresti og af þeim sökum sé hann mjög skuldugur í dag. Hann sé nú ellilífeyrisþegi og hafi litlar ráðstöfunartekjur.

Í upphafi hafi húsbréfalán kæranda vegna eignar hans að X nr. 3 verið 3,5 milljónir króna. Í dag sé sú upphæð 11–12 milljónir króna. Árið 1994 hafi kærandi tekið svokallað „vandræðalán“ að fjárhæð 1.238 þúsund krónur sem hafi átt að færa skuldastöðu kæranda til betra horfs, en það hafi ekki gengið eftir. Kærandi segist nú standa í því að selja eign sína X nr. 3 og að hann hafi fest kaup á minni íbúð að Y nr. 11 í þeim tilgangi að grynnka á skuldum sínum. Til að auka líkurnar á því að það markmið náist hafi kærandi farið fram á það við kærða að „vandræðalán“ hans yrði fellt niður.

Afstaða kærða er byggð á greinargerð hans, dags. 31. október 2003.

Kærði segir að árið 1991 hafi kærandi fengið greiðsluerfiðleikalán hjá kærða, sem breytt hafi verið með skuldbreytingarláni því er kærandi kalli „vandræðalán“ árið 1994. Kærandi hafi einnig ítrekað fengið frystingu á lánum sínum hjá kærða í þeim tilgangi að kærandi gæti staðið í skilum.

Kærði segir hins vegar að í september 2003 hafi kærandi fest kaup á Y nr.11 í og öll lán hans á X nr. 3 verið greidd upp í sama mánuði, þar á meðal skuldbreytingarlánið frá 1994 sem kærandi hefði sótt um niðurfellingu á. Kærði bendir á að heimildir kærða til afskrifta séu tæmandi taldar í 47. gr. laga nr. 44/1998 um húsnæðismál, með síðari breytingum. Tilvik kæranda falli þar ekki undir og því beri að hafna kröfu kæranda.

IV. Niðurstaða

Málskotsheimild kæranda er reist á 2. mgr. 42. gr. laga um húsnæðismál, nr. 44/1998, sbr. lög nr. 77/2001 og 18. gr. reglugerðar um viðbótarlán nr. 783/1998.

Málið varðar þá ákvörðun Íbúðalánasjóðs að synja kæranda um niðurfellingu á skuldbreytingarláni hans. Voru forsendur synjunarinnar þær að lánið væri þegar uppgreitt af hans hálfu og auk þess uppfyllti hann ekki skilyrði 47. gr. laga nr. 44/1998 um húsnæðismál, um heimild til niðurfellingar á lánum.

Hið umdeilda skuldbreytingalán, bankabréf nr. Z, er dagsett 28. október 1994. Samkvæmt upplýsingum kærunefndar var umrætt lán greitt upp þann 17. september 2003. Þegar af þessari ástæðu telur kærunefnd að ekki sé unnt að verða við kröfu kæranda að umrætt lán, sem er uppgreitt, verði fellt niður, enda eru engar heimildir til slíks að finna í lögum nr. 44/1998 um húsnæðismál.

  

Ú R S K U R Ð A R O R Ð :

Kröfu A, um að synjun Íbúðalánasjóðs um niðurfellingu á skuldbreytingarláni hans verði felld úr gildi, er hafnað.

                               

 

Þuríður Jónsdóttir, formaður

Ástráður Haraldsson

Vífill Oddson