Mál nr. 7/2004

12.11.2004

Föstudaginn 12. nóvember 2004 var á fundi kærunefndar húsnæðismála tekið fyrir mál nr. 7/2004:

 

A

gegn

Íbúðalánasjóði

 

og kveðinn upp svohljóðandi

 

Ú R S K U R Ð U R:

A, hér eftir nefndur kærandi, hefur með kæru, dags. 27. júlí 2004, sem barst kærunefnd 29. sama mánaðar, skotið til nefndarinnar ákvörðun Íbúðalánasjóðs, hér eftir nefndur kærði, dags. 9. júlí 2004, þar sem kröfum kæranda um skaðabætur vegna meints afgreiðsludráttar á skiptum fasteignaveðbréfs fyrir rafræn húsbréf var hafnað.

 

I. Málsmeðferð

Með bréfi, dags. 30. júlí 2004, leitaði kærunefnd húsnæðismála upplýsinga og gagna hjá kærða og afstöðu hans til kærunnar. Barst bréf kærða, dags. 26. ágúst 2004, ásamt fylgigögnum 27. sama mánaðar. Kæranda var þann 30. ágúst sl. sent afrit bréfs og gagna og gefinn kostur á að gera athugasemdir. Athugasemdir bárust með bréfi dags. 2. september 2004. Með bréfi, dags. sama dag, var kærða gefinn kostur á að gera frekari athugasemdir. Kærði sendi bréf þar sem áréttuð er fyrri afstaða og var það sent kæranda til upplýsingar. Með bréfi, dags. 21. september 2004 óskaði kærunefndin eftir áliti kærða á því hvort í bréfi starfsmanns kærða, dags. 9. júlí 2004, felist lokasvar sjóðsins vegna kröfu kæranda málsins í umboði stjórnar sjóðsins. Með bréfi dags. 24. september 2004 bárust athugasemdir frá kærða. Með bréfi dags. 15. október 2004 barst svar við bréfi nefndarinnar frá 21. september 2004. Með bréfi kærunefndarinnar dags. 20. október 2004 er kæranda gefinn kostur á frekari athugasemdum. Með bréfi dags. 22. október 2004 bárust athugasemdir kæranda.

 

II. Helstu málsatvik og kæruefni

Kærandi óskaði eftir því við kærða að þinglýstu fasteignaveðbréfi yrði skipt fyrir rafræn húsbréf. Bréf með þessari beiðni var boðsent og barst kærða um hádegi mánudaginn 28. júní 2004. Með bréfinu fylgdi fasteignaveðbréfið, sem þinglýst hafði verið án athugasemda, að fjárhæð 8.450.000 krónur. Vegna væntanlegra breytinga á lánakerfi kærða þann 1. júlí sl. var sérstaklega óskað skjótrar afgreiðslu og að kvittun yrði send í tiltekinn bréfasíma þegar skiptin hefðu farið fram.

Starfsmaður kærða óskaði samdægurs eftir því við kæranda að umboð yrði sent en kærandi skrifaði undir fasteignaveðbréfið fyrir hönd skuldara samkvæmt umboði. Var umboðið sent án tafar í uppgefinn bréfasíma. Þar sem kæranda barst ekki umbeðin kvittun gekk hann ítrekað eftir því á þriðjudeginum og miðvikudeginum með símhringingum og tölvupóstsendingum að umrædd skipti færu fram.

Kvittun fyrir því að búið væri að skipta fasteignaveðbréfinu fyrir rafræn húsbréf barst kæranda í bréfsíma kl. 15:15 miðvikudaginn 30. júní sl. og gekk hann þá strax í að selja bréfin.

 

III. Sjónarmið kæranda

Kærandi mótmælir því að umsókn hans hafi verið áfátt enda hafi verið búið að þinglýsa umræddu fasteignaveðbréfi athugasemdalaust. Starfsmaður kærða hafi þó talið nauðsynlegt að fá að sjá umboð og hafi það umsvifalaust verið sent í tiltekinn bréfasíma. Síðdegis á mánudeginum hafi þannig verið búið að bæta úr því sem kærði taldi umsókn áfátt. Kærandi viti til þess að annar aðili í sveitarfélaginu B sem þinglýsti fasteignaveðbréfi á mánudeginum, og hafi því væntanlega ekki getað komið því til kærða fyrr en á þriðjudag, hafi verið kominn með kvittun fyrir skiptum í hendurnar fyrir hádegi á miðvikudeginum og fengið fullt verð fyrir sín bréf. Kærandi telur að bréf sitt hafi verið mislagt og afgreiðsla því tafist þrátt fyrir mikla eftirgangsmuni hans.

Í athugasemdum sínum við greinargerð kærða vísar kærandi til þeirra upplýsinga sem þar koma fram, þ.e. að 620 umsóknir hafi borist kærða þriðjudag og miðvikudag eða eftir að hans umsókn barst og hafi allar verið afgreiddar fyrir bankalokun á miðvikudegi.

Tilboð þess aðila sem hann leitaði til um kaup á bréfunum var lægra en hefði átt að fást fyrir þau samkvæmt upplýsingum um gengi húsbréfa á vefnum þegar kvittunin um skiptin var send kæranda. Annar aðili sem kærandi leitaði til upplýsti að bréfin væru að hríðfalla og að hann hefði hætt að kaupa bréf kl. 15:00 þennan sama dag. Kærandi seldi þeim aðila sem hann leitaði fyrst til bréfin á 8.906.972 krónur en samkvæmt uppgefnu gengi á vefnum hefðu átt að fást fyrir þau 9.016.459 krónur. Kærandi telur sig hafa orðið fyrir tjóni sem nemur mismun þessara fjárhæða eða 109.487 krónur og telur að kærði beri ábyrgð á því vegna seinagangs síns við afgreiðslu málsins. Ljóst sé því að hann hafi orðið fyrir alvarlegri mismunun af hendi kærða.

 

IV. Sjónarmið kærða

Bent er á að kærandi starfi við fasteignasölu og honum hafi mátt vera ljóst að með því að senda kærða strax áskilin gögn ykjust líkur á hraðri afgreiðslu. Kærandi hafi verið hvort tveggja í senn, seljandi viðkomandi fasteignar og umboðsmaður kaupenda.

Kærði vísar til þess að gífurlegt álag hafi verið vegna hinna fyrirhuguðu breytinga á lánakerfi húsnæðislána þann 1. júlí sl. Þriðjudaginn 29. júní og miðvikudaginn
30. júní 2004 hafi borist 620 umsóknir um skipti fasteignaveðbréfa fyrir húsbréf en þær séu alla jafna 50 á dag þegar mikið sé að gera. Allir hafi óskað eftir skiptum fyrir 1. júlí sl. Kærandi hafi með símbréfi þann 29. júní óskað eftir að fá kvittun senda strax og hún væri gefin út og með símbréfi þann 30. júní óskað eftir því að umsókn hans fengi forgang svo hann gæti fengið peninga út fyrir bankalokun. Kvittun um skiptin hafi verið send honum vel fyrir lokun banka eða kl. 15.15 á miðvikudeginum 30. júní sl. Kærði telur því að afgreiðsla hafi verið eðlileg miðað við aðstæður og í reynd í samræmi við óskir kæranda. Ekki hafi verið um neina mismunun að ræða við afgreiðslu umsókna eða sök sem bótakrafa verði reist á. Kærði geti ekki ábyrgst kjör markaðarins á húsbréfum.

 

V. Niðurstaða

Málskot kæranda er reist á 1. mgr. 42. gr. laga um húsnæðismál nr. 44/1998. Hin kærða ákvörðun var tekin 30. júní 2004 en kæra er dagsett 27. júlí 2004. og barst nefndinni 29. júlí sama ár. Hún er því komin fram innan kærufrests sem er fjórar vikur.

Mál þetta varðar þá kröfu kæranda að kærði bæti honum tjón sem hann telur sig hafa orðið fyrir vegna meints afgreiðsludráttar vegna seinagangs kærða þegar óskað var eftir skiptum á fasteignaveðbréfi fyrir rafræn húsbréf. Kærandi telur tjón sitt vera mismun þeirrar fjárhæðar sem fékkst greidd fyrir húsbréfin er þau voru seld og þeirrar fjárhæðar sem kærandi telur að fengist hefði fyrir þau ef afgreiðsla beiðni hans hefði verið með eðlilegum hætti. Vegna þessa hafi hann orðið fyrir tjóni sem nemur 109.487 kr.

Við úrlausn málsins verður að líta til þess að óvenjumikið álag var á kærða á þeim tíma sem um ræðir. Vegna fyrirhugaðra breytinga á lánakerfinu 1. júlí 2004 bárust 620 umsóknir 29. og 30. júní um skipti fasteignaveðbréfa fyrir húsbréf en þær voru annars alla jafna 50 á dag þegar mikið var að gera. Einnig verður að líta til þess að á þessum anna tíma barst umsókn um skipti fasteignaveðbréfa fyrir húsbréf frá kæranda sem var áfátt, það er umboð frá skuldurum til kæranda skorti. Umsókn kæranda kemur inn til kærða 28. júní 2004, daginn eftir er bætt úr þeim ágalla sem var á málinu. Afgreiðsla málsins fer síðan fram fyrir bankalokun þann 30. júní 2004. Með hliðsjón af framangreindu telur kærunefnd húsnæðismála að kærði hafi á engan hátt bakað sér skaðabótaábyrgð gagnvart kæranda, þar sem afgreiðsla málsins var með eðlilegum hætti með hliðsjón af aðstæðum.

 

Ú R S K U R Ð A R O R Ð :

 Skaðabótakröfu kæranda er hafnað.

 

 

Þuríður Jónsdóttir, formaður

Ástráður Haraldsson

Vífill Oddsson