Mál nr. 3/2009

21.9.2009

Mánudaginn 21. september 2009 var á fundi kærunefndar húsnæðismála tekið fyrir mál nr. 3/2009:

A

gegn

Íbúðalánasjóði

 

og kveðinn upp svohljóðandi

 

Ú R S K U R Ð U R:

A, hér eftir nefndur kærandi, hefur með kæru, dagsettri 30. júní 2009, skotið til nefndarinnar ákvörðun Íbúðalánasjóðs, hér eftir nefndur kærði, dagsettri 26. maí 2009, þar sem kæranda var synjað um greiðsluerfiðleikaaðstoð.

 

I. Málsmeðferð

Með bréfi, dagsettu 16. júlí 2009, óskaði kærunefnd húsnæðismála eftir upplýsingum um meðferð málsins og frekari gögnum ef þau væru fyrir hendi hjá Íbúðalánasjóði, einnig að tekin yrði afstaða til kærunnar. Greinargerð kærða barst með bréfi dagsettu 27. júlí 2009. Með bréfi dagsettu 5. ágúst 2009 var greinargerðin send kæranda til kynningar. Ekki bárust frekari athugasemdir frá kæranda.

 

II. Helstu málsatvik og kæruefni

Með tölvupósti þjónustufulltrúa bankans B, dagsettum 24. apríl 2009, var óskað eftir frystingu lána í eitt ár hjá Íbúðalánasjóði. Með bréfi Íbúðalánasjóðs, dagsettu 26. maí 2009, var kæranda tilkynnt að sjóðurinn gæti ekki orðið við beiðni hans um greiðslufrest/lengingu né skuldbreytingu á vanskilum hans við stofnunina. Lausn finnist ekki í umsókninni, sbr. 4. tölul. 4. gr. reglugerðar nr. 584/2001. Í kjölfarið sendi kærandi kæru til kærunefndar húsnæðismála, dagsetta 30. júní 2009.

 

III. Sjónarmið kæranda

Kærandi bendir á að eins og svo margir í dag sé hann að reyna að hagræða sínum málum þannig að hann lendi ekki í vanskilum og þess vegna hafi kærandi sótt um að fá frystingu.

Eins og staðan sé núna hjá kæranda rétt náist endar saman en ekki megi mikið út af bregða. Vegna aðstæðna í þjóðfélaginu hafi kærandi og maki fengið skerðingu á yfirvinnu og það hafi rýrt tekjur þeirra svo um muni. Einnig komi auknar tekjur inn á heimilið í haust þegar maki kæranda fer í aukna vinnu.

 

IV. Sjónarmið kærða

Kærði bendir á að með bréfi, dagsettu 26. maí 2009, hafi kæranda verið tilkynnt um synjun á greiðsluerfiðleikaaðstoð þar sem úrræði kærða dugi ekki til að færa greiðslubyrði umsækjanda undir greiðslugetu hans eins og áskilið sé í 4. tölul. 1. mgr. 4. gr. reglugerðar nr. 584/2001.

Bendir kærði á fjárhagsyfirlit kæranda og maka hans þar sem fram komi að staða reiknist neikvæð um 76.797 krónur að loknu frystingartímabili.

 

V. Niðurstaða

Málskot kæranda er reist á 1. mgr. 42. gr. laga um húsnæðismál nr. 44/1998. Hlutverk kærunefndar húsnæðismála er að skera úr ágreiningsmálum er kunna að rísa vegna ákvarðana Íbúðalánasjóðs og húsnæðisnefnda sbr. 1. mgr. 41. gr. laganna.

Kærandi sótti um frystingu lána í eitt ár hjá Íbúðalánasjóði en var synjað þar sem ekki finnist lausn í umsókninni, sbr. 4. tölul. 4. gr. reglugerðar um úrræði til að bregðast við greiðsluvanda vegna lána Íbúðalánasjóðs, nr. 584/2001, sem hljóðar svo:

Að greiðslubyrði umsækjanda eftir skuldbreytingu og/eða frestun á greiðslum og/eða lengingu lánstíma rúmist innan greiðslugetu.

Rétt er að fram komi að í niðurstöðu Íbúðalánasjóðs um synjun á erindi kæranda var ekki leiðbeint um kæruleið eins og lög áskilja.

Kærunefnd húsnæðismála telur með vísan til framangreinds ákvæðis reglugerðar
nr. 584/2001 ekki efni til að gera athugasemdir við afgreiðslu Íbúðalánasjóðs.

 

Ú R S K U R Ð A R O R Ð :

Kæru A, um að synjun Íbúðalánasjóðs um greiðsluerfiðleikaaðstoð verði felld úr gildi, er hafnað.

 

Þuríður Jónsdóttir, formaður

Ástráður Haraldsson

Vífill Oddsson