Mál nr. 9/2009

5.2.2010

Föstudaginn 5. febrúar 2010 var á fundi kærunefndar húsnæðismála tekið fyrir mál nr. 9/2009:

A og B

gegn

Íbúðalánasjóði

 

og kveðinn upp svohljóðandi

 

Ú R S K U R Ð U R:

 

A og B, hér eftir nefnd kærendur, hafa með ódagsettri kæru, móttekinni 13. nóvember 2009, krafist þess að fengnir verði hlutlausir aðilar til að endurmeta eign sína X.

 

I. Málsmeðferð

Með bréfi, dagsettu 1. desember 2009, óskaði kærunefnd húsnæðismála eftir upplýsingum um meðferð málsins og frekari gögnum ef þau væru fyrir hendi hjá Íbúðalánasjóði, einnig að tekin yrði afstaða til kærunnar. Með bréfi nefndarinnar, dagsettu 22. desember 2009, var ítrekuð beiðni kærunefndar um greinargerð og veittur viðbótarfrestur til 12. janúar 2010. Greinargerð kærða barst með bréfi dagsettu 11. janúar 2010. Með bréfi nefndarinnar, dagsettu 12. janúar 2010, var greinargerðin send kærendum til kynningar. Ekki bárust frekari athugasemdir frá kærendum.

 

II. Helstu málsatvik og kæruefni

C sótti um lánveitingu vegna kaupa á X samkvæmt kaupsamningi dagsettum 23. september 2009. Kærði fór fram á nýtt verðmat með beiðni til trúnaðarmanns, dagsettu 7. október 2009. Trúnaðarmaður mat eignina og í kjölfarið var kaupanda synjað um lánveitingu vegna ósamræmis milli kaupverðs og fasteignamats X. Við það vildu kærendur ekki una og leituðu því atbeina kærunefndar húsnæðismála.

 

III. Sjónarmið kærenda

Kærendur kvörtuðu upphaflega vegna verðmats sem fasteignasalan D framkvæmdi á eign kærenda þann 8. október 2009.

Kærendur greina frá því að fyrir þremur árum, eftir að eignaskiptasamningur hafði verið gerður, mældist eignin 190,1 m² með bílskúr. Þá hafi eignin verið sett á sölu með ásettu verði 25.900.000 króna enda hafði verið ráðist í viðamiklar framkvæmdir á húsnæðinu, meðal annars á þaki. Síðastliðið sumar hafi verið ráðist í múrviðgerðir á húsinu og í haust hafi allt húsið verið málað. Fyrir þessar framkvæmdir hafi kærendur greitt 2.640.000 króna. Auk þess hafi verið skipt um sumar lagnir, hurðir, gólfefni og fleira.

Síðastliðið sumar hafi íbúðin verið leigð en auk þess verið á sölu hjá fasteignasölunni E þar sem ásett verð hafi verið 24.900.000 króna. Loks hafi borist ásættanlegt kauptilboð í eignina sem nú sé búið að kollvarpa með framangreindu verðmati.

Kærendur benda á að sama fasteignasala sé með til sölu eign í sveitarfélaginu R að Z sem byggð var 1958, á 2. hæð, 102 m² á 18.300.000 króna sem gerir 179.411 krónur á hvern fermetra. Íbúðalánasjóður sé einnig með fokhelda eign, 128 fermetra að Y í sveitarfélaginu R á 15.500.000 króna sem geri 121.000 krónur á fermetra.

Með vísan til framangreinds sé það kærendum óskiljanlegt hvernig trúnaðarmaður kærða hafi getað ályktað sem svo í hans sölumati að það þurfi að klæða þetta hús þar sem á því hafi verið gerðar viðamiklar múrviðgerðir af fagmönnum. Einnig hafi hann ályktað ranglega með bílskúr, þar sé bæði rafmagn og vatn, jafnframt sé skúrinn einangraður, síðan verðmetið það að eigin geðþótta á 17.000.000 króna eða 89.000 krónur á fermetra.

 

IV. Sjónarmið kærða

Í greinargerð sinni bendir kærði á að ferill málsins hafi verið eftirfarandi:

Umsókn til kærða hafi borist 1. október 2009, en kaupsamningur sé dagsettur 23. september 2009. Tilkynning til kaupanda um sérstakt verðmat sé dagsett 5. október 2009. Beiðni til trúnaðarmanns um verðmat sé dagsett 7. október 2009. Verðmat frá trúnaðarmanni sé dagsett 8. október 2009 og þá sé synjun og tilkynning um verðmat dagsett 12. október 2009.

Kaupsamningur milli kæranda, B, sem sé seljandi, og C um sérhæð að X beri með sér að verulegt ósamræmi sé milli kaupverðs og fasteignamats eignarinnar en umsamið kaupverð hafi verið 24.900.000 króna en fasteignamat íbúðar, lóðar og bílskúrs samtals 16.850.000 króna.

Með vísan til 30. gr. reglugerðar nr. 522/2004, með síðari breytingum, hafi verið óskað verðmats löggilts fasteignasala sem trúnaðarmanns kærða og hann hafi metið eignina á 17.600.000 króna.

Kaupanda standi til boða að kærði miðaði lánveitingu sína við verðmat trúnaðarmanns, eins og reglur segi til um, en verðmatið sé ívið hærra en fasteignamat eignarinnar.

 

V. Niðurstaða

Málskot kæranda er reist á 1. mgr. 42. gr. laga um húsnæðismál, nr. 44/1998. Hlutverk kærunefndar húsnæðismála er að skera úr ágreiningsmálum er kunna að rísa vegna ákvarðana Íbúðalánasjóðs og húsnæðisnefnda, sbr. 1. mgr. 41. gr. laganna.

Kærendur gera þá kröfu fyrir kærunefnd húsnæðismála að fengið verði nýtt verðmat á fasteigninni X.

Í 30. gr. reglugerðar um ÍLS-veðbréf og íbúðabréf, nr. 522/2004, með síðari breytingum, er kveðið á um þær reglur sem gilda um matsverð íbúða við afgreiðslu ÍLS-veðbréfa:

1. Matsverð notaðrar íbúðar er kaupverð hennar.
2. Matsverð nýrrar íbúðar er byggingarkostnaður hennar eða kaupverð.
3. Matsverð viðauka við íbúð er kaupverð eða byggingarkostnaður.
4. Matsverð endurbóta er staðfestur framkvæmdakostnaður.

Þá sé Íbúðalánasjóði heimilt að synja um lánveitingu ef:

1. kaupverð telst vera í verulegu ósamræmi við markaðsverð eða fasteignamat íbúðar eða
2. hluti kaupverðs íbúðar er framlag seljanda til kaupanda.

Þá er þess getið í reglugerðinni að í þeim tilvikum sem um getur í a- og b-lið 2. mgr. 30. gr. reglugerðarinnar getur kærði þó falið sérstökum trúnaðarmönnum að meta markaðsverð íbúðar og byggt á því mati.

Íbúðalánasjóður taldi að verulegt ósamræmi væri milli kaupverðs og fasteignamats eignarinnar. Var því óskað verðmats löggilts fasteignasala sem trúnaðarmanns Íbúðalánasjóðs. Sjóðurinn benti á að kaupanda stæði til boða að miða lánveitingu við verðmat trúnaðarmanns, en það hafi verið hærra en fasteignamat eignarinnar.

Í reglugerð um ÍLS-veðbréf og íbúðabréf, nr. 522/2004, með síðari breytingum, er ekki gert ráð fyrir að kærunefnd húsnæðismála geti kallað til aðila til að endurmeta eignir. Ber því að staðfesta afgreiðslu Íbúðalánasjóðs.

Með vísan til framangreinds og 30. gr. reglugerðar nr. 522/2004 telur kærunefnd húsnæðismála ekki efni til að gera athugasemdir við afgreiðslu Íbúðalánasjóðs.

 

Ú R S K U R Ð A R O R Ð :

Kæru A og B um kröfu þess efnis að fengnir verði hlutlausir aðilar til að endurmeta fasteignin X, er hafnað.

 

Þuríður Jónsdóttir, formaður

Ástráður Haraldsson

Vífill Oddsson