Mál nr. 6/2010

25.5.2010

Þriðjudaginn 25. maí 2010 var á fundi kærunefndar húsnæðismála tekið fyrir mál nr. 6/2010:

A

gegn

Íbúðalánasjóði

 

og kveðinn upp svohljóðandi

 

Ú R S K U R Ð U R:

A, hér eftir nefndur kærandi, hefur með kæru, dagsettri 24. mars 2010, krafist þess að gert verði endurmat á íbúð í X nr. 29 í R þar sem hann telur mat trúnaðarmanns ekki hafa verið nægilega vandað.

 

I. Málsmeðferð

Með bréfi, dagsettu 26. mars 2010, óskaði kærunefnd húsnæðismála eftir upplýsingum um meðferð málsins og frekari gögnum ef þau væru fyrir hendi hjá Íbúðalánasjóði, hér eftir nefndur kærði, og að tekin yrði afstaða til kærunnar. Greinargerð kærða barst með bréfi, dagsettu 15. apríl 2010. Með bréfi nefndarinnar, dagsettu 16. apríl 2010, var greinargerðin send kæranda til kynningar. Frekari athugasemdir kæranda bárust með bréfi, dagsettu 21. apríl 2010, og var afrit af því sent kærða með bréfi nefndarinnar, dagsettu 27. apríl 2010.

 

II. Helstu málsatvik og kæruefni

Kærandi sótti um lánveitingu vegna kaupa á X nr. 29 samkvæmt kauptilboði dagsettu 8. mars 2010. Kaupverð var 22.500.000 krónur og fasteignamat íbúðarinnar var 17.050.000 krónur. Vegna þess munar sem var á kaupverði og fasteignamati óskaði kærði eftir mati trúnaðarmanns sem mat markaðsverð íbúðarinnar 16.000.000 kr. Í kjölfarið var kæranda synjað um lánveitinguna en stóð til boða lánafyrirgreiðsla í samræmi við mat trúnaðarmanns. Við þetta vildi kærandi ekki una og leitaði því til kærunefndar húsnæðismála.

 

III. Sjónarmið kæranda

Kærandi vísar til umsóknar sinnar til kærða um lán að fjárhæð 18.000.000 króna samkvæmt samþykktu kauptilboði, dagsettu 8. mars 2010, og svarbréfs kærða, dags. 17. mars 2010, þar sem umsókn hans var synjað.

Kærandi greinir frá því að samkvæmt samþykkta kauptilboðinu hafi honum boðist að kaupa eignina af foreldrum sínum á 22.500.000 krónur sem hafi miðast við ásetta verðið á eigninni Samkvæmt synjunarbréfi kærða vilji hann aðeins samþykkja söluverð að fjárhæð 16.000.000 kr.

Kærandi sættir sig ekki við þessa afgreiðslu sjóðsins á þrennum forsendum. Í fyrsta lagi séu samkvæmt auglýsingum á fasteignamarkaði sambærilegar íbúðir, þ.e. þriggja herbergja íbúðir, um 80 fermetrar, almennt auglýstar á verðbilinu 19.000.000 króna til 24.000.000 króna. Kærandi bendir á að umrædd íbúð sé á jarðhæð og henni fylgi sérlóðarskiki sem sé afgirt verönd. Í öðru lagi sé verð kærða undir fasteignamati sem þó hafi verið lækkað talsvert nýlega en fasteignasalar sem kærandi hafi ráðfært sig við segi að sé svona lítil íbúð verðlögð undir fasteignamati hljóti hún að vera léleg. Matsmaður kærða sem hafi komið á staðinn hafi marglýst því yfir að íbúðin væri mjög góð. Í þriðja og síðasta lagi hafi matið verið ákvarðað einhliða af sjóðnum og virtist byggt á áliti eins manns. Kærandi telur að hann eigi að hafa kost á að leggja fram mat frá þriðja aðila sem báðir aðilar geti sætt sig við.

Kærandi telur að verðmat trúnaðarmanns hafi ekki verið nægilega vandað, lýsing eignar sé til dæmis ekki nákvæm.

 

IV. Sjónarmið kærða

Kærði greinir frá því að kærandi hafi sótt um lánafyrirgreiðslu vegna kaupa á íbúð í X nr. 29. Kaupverð hafi verið samkvæmt kaupsamningi 22.500.000 krónur.

Fasteignamat íbúðarinnar og lóðarhluta sé samtals 17.050.000 krónur og hafi verulegur munur á fasteignamati og kaupverði verið tilefni til þess að kærði hafi óskað eftir mati trúnaðarmanns og hann hafi metið markaðsverð íbúðarinnar 16.000.000 krónur, sbr. 30. gr. reglugerðar um ÍLS-veðbréf og íbúðabréf, nr. 522/2004, með síðari breytingum.

Þá standi kæranda til boða lánafyrirgreiðsla í samræmi við mat trúnaðarmanns.

 

V. Niðurstaða

Málskot kæranda er reist á 1. mgr. 42. gr. laga um húsnæðismál, nr. 44/1998. Hlutverk kærunefndar húsnæðismála er að skera úr ágreiningsmálum er kunna að rísa vegna ákvarðana Íbúðalánasjóðs og húsnæðisnefnda, sbr. 1. mgr. 41. gr. laganna.

Kærandi gerir þá kröfu fyrir kærunefnd húsnæðismála að gert verði endurmat á umræddri íbúð í X nr. 29 þar sem hann telji það ekki nógu vandað.

Í 30. gr. reglugerðar um ÍLS-veðbréf og íbúðabréf, nr. 522/2004, með síðari breytingum, er kveðið á um þær reglur sem gilda um matsverð íbúða við afgreiðslu ÍLS-veðbréfa:

1. Matsverð notaðrar íbúðar er kaupverð hennar.
2. Matsverð nýrrar íbúðar er byggingarkostnaður hennar eða kaupverð.
3. Matsverð viðauka við íbúð er kaupverð eða byggingarkostnaður.
4. Matsverð endurbóta er staðfestur framkvæmdakostnaður.

Þá sé Íbúðalánasjóði heimilt að synja um lánveitingu ef:

1. kaupverð telst vera í verulegu ósamræmi við markaðsverð eða fasteignamat íbúðar eða
2. hluti kaupverðs íbúðar er framlag seljanda til kaupanda.

Þá er þess getið í reglugerðinni að í þeim tilvikum sem um getur í a- og b-lið 2. mgr. 30. gr. reglugerðarinnar getur kærði þó falið sérstökum trúnaðarmönnum að meta markaðsverð íbúðar og byggt á því mati.

Íbúðalánasjóður taldi að verulegt ósamræmi væri milli fasteignamats og kaupverðs eignarinnar. Var því óskað verðmats löggilts fasteignasala sem trúnaðarmanns Íbúðalánasjóðs. Sjóðurinn benti á að kaupanda stæði til boða lánafyrirgreiðsla í samræmi við mat trúnaðarmanns.

Hvorki í lögum um húsnæðismál, nr. 44/1998, með síðari breytingum, né reglugerðum settum samkvæmt þeim, er ekki gert ráð fyrir að kærunefnd húsnæðismála geti kallað til aðila til að endurmeta eignir. Ber því að staðfesta afgreiðslu Íbúðalánasjóðs.

Með vísan til framangreinds og 30. gr. reglugerðar nr. 522/2004 telur kærunefnd húsnæðismála ekki efni til að gera athugasemdir við afgreiðslu Íbúðalánasjóðs.

 

Ú R S K U R Ð A R O R Ð :

Kæru A, um kröfu þess efnis að gert verði endurmat á eigninni X nr. 29, er synjað.

 

Þuríður Jónsdóttir, formaður

Ástráður Haraldsson

Vífill Oddsson