Starfshópur um heildarendurskoðun laga um sjúklingatryggingu nr. 111/2000
Verkefni hópsins er að vinna drög að lagafrumvarpi um nauðsynlegar breytingar á núgildandi lögum eða eftir atvikum nýjum heildarlögum um sjúklingatryggingu. Meðal annars er óskað eftir því að starfshópurinn taki eftirfarandi sérstaklega til skoðunar:
· Hvort rétt sé að aðgreina læknismeðferðir eða rannsóknir á opinberum heilbrigðisstofnunum annars vegar og einkareknum hins vegar.
· Hvort rétt sé að breyta viðmiðum um hámarksbætur.
· Hvort rétt sé að sjúklingatrygging bæti aukaverkanir vegna lyfja og þá sérstaklega þegar um er að ræða lyf á borð við bóluefni, sem sóttvarnayfirvöld hvetja til að einstaklingar þiggi.
· Rétt til bóta vegna sjúkdómsmeðferðar sem veitt er í heimahúsi.
· Réttar til bóta vegna andláts barns.
· Hvort gera eigi einstaklingum skylt að tæma rétt sinn úr sjúklingatryggingu og kæruleiðir, áður en dómsmál vegna afleiðingar læknismeðferðar er höfðað.
· Málsmeðferð Sjúkratrygginga Íslands, m.a. varðandi gagnaöflun.
· Hvort heimildir laganna vegna vinnslu persónuupplýsinga séu fullnægjandi.
· Skyldu heilbrigðisstarfsfólks til að upplýsa um sjúklingatryggingu.
Þess er óskað að starfshópurinn skili frumdrögum að frumvarpi 15. maí 2023 ásamt áformum og frummati á áhrifum og fullunnum drögum að frumvarpi 15. ágúst 2023. Stefnt er að því að leggja frumvarpið fram á Alþingi á haustþingi 2023. Gert er ráð fyrir því að hópurinn kalli helstu hagaðila að borðinu við sín störf.
Starfshópinn skipa
- Angela G. Eggertsdóttir, án tilnefningar, formaður
- Berglind Ýr Karlsdóttir, tilnefnd af Sjúkratryggingum Íslands
- Hrefna Þengilsdóttir, tilnefnd af embætti landlæknis
Starfshópurinn er skipaður af heilbrigðisráðherra 5. janúar 2023.